per chi riesce a leggere il dialetto........
ecco il mio LUT racconto direttamente dal forum dell' ASD SCARPEBIANCHE (
www.scarpebianche.it)
Eccome qua, a quasi na settimana de distanza dal weekend principe del 2013 a cercar de raccontarve, de rendarve partecipi, de farve conosca cossa che le stata par mi, e credo anca par l’allegra spedizione, sti 4 mesi intensi che ce ha portà a vivar 3 fantastici giorni dolomitici!
Intanto vedon come ghe son rivai a sta corsa:
14 Febbraio 2013…….San Valentino? No, giorno de apertura dee iscrizion dea Lavaredo Ultra Trail 2013! Giorno che ha dat el via al marasma in casa Scarpebianche!! Prime iscrizion, è si, ghe vol sempre quel che butta el sas, ma no se tira via a man, no, se fa subito el gruppo su wathsapp par vedar de tirar dentro i indecisi! Tra un messaggio, na monada, meda busia, sfottò, “e ma vutu vedar che no te è coraio”, “e mi pi che ti”, “e ti no te ghea farè mai”…….riuscion a iscrivarse in 10…….no monae……in 10, che dopo i sarà 11 col re dea LUT Fabio “Tarzan” Caverzan!
Solo el Bettiope, saldo come un scoglio, no se fa trascinar dal mar in burrasca, ma par no mancar a Cortina, el se iscrive al Cortina Trail a sorella minore che se corre al sabo!
Unico ostacolo burocratico par confermar l’iscrizion……..corsa qualificante da 2 punti, già in programma par tutti, Ultrabericus a metà Marzo che servirà a formalizzar chi che no aveva i 2 punti e come lungo iniziale a chi già li aveva!
Primo ostacolo e prima defezion, el bon Olemaleghe causa problemi a schena (el mal che va per la maggiore in ASD ScarpeBianche) ghe tocca saltar a corsa Vicentina e ghe tocca abbandonar anca l’idea de farse sti 120km in montagna!
Tristezza infinita in seno al gruppo, porca miseria, manca ancora 4 mesi e già ghin perdion uno….. cossa succederà vanti fine Giugno!
Bhè, in 4 mesi de preparazion, ghin succedarà de tutti i coeori!
4 mesi a cercar de seguir e tabee gentilmente concesse dai cognati tabeari Colla/Marangon!
4 mesi a cercar ogni dritta possibie e immaginabie par avvicinarse meio che se pol!
4 mesi a studiar e pendenze e lunghezze de tutte e saite dea pedemontana par far e ripetute!
4 mesi de cardiofrequenzimetro che rifiuton de usar!
4 mesi de allenamenti de mattina bonora e sera tarda!
4 mesi de acqua, si, proprio sto anno che no se pol perdar medo allenamento, piove tutti i dì!
4 mesi tra doeori improvvisi, maeattie impossibili, occi che se sgionfa, caicce che se storde, denocci che ormai parla, tibiali, quadricipiti, polpacci duri, bastoncini da comprar, giacca da trovar, femorai, sangue da nass, scarpe da cambiar, luce frontae da sistemar, squaraus fulminante, alimentazion da regoear, lunghi notturni, tramonti e albe in grappa, peter pan, neve, maltodestrine, glucosio, polase, sali, barrette, Zavarise, crampi, discese a bomba, gran dorocche, ripetute in saita, scatti sue rampe, coronarie al limite, calzet, barete, manicotti……..l’enciclopedia dell’ UltraTrail Running insomma!
In qualche modo rivon a fine maggio, in qualche modo fon l’ultimo lungo, in vari gruppetti, rigorosamente de not e rigorosamente in grappa o pianezze , rigorosamente coi soiti acciacchi/defezion, e qua scumizzia a insidiarse i primi pensieri de poder no farghe a portarla casa………szentovintikiometri in montagna i e tanti cazzo!
Ultime 3 settimane co 3 rischi de abbandono tra pubalgia, denoccio in sciopero e mancanza de lunghi adeguati…..ma fortunatamente riva el fatidico 28 giugno e gnessunaltri abbandona!
Chi in pulmin col super autista Johnny(che meritarà medaia de oro), chi in macchina, vendre pomeriggio son tutti diretti a Cortina ma, dentro un bar a San Vito de Cadore me riva in recia a notizia shock, che el teefonin ce conferma, causa i 30cm de neve dea not prima, no se podarà ndar sora i 2000mt de quota e quindi a Lut sarà rimpicciolia a 85km…….co partenza non più alle 23.00 ma alle 8.00 del mattino seguente!
El sconforto ce accompagna fin al ritiro pettorali, col tommy ValdeaBoria che sembra no darse pace visto l’imprevista tenacia del so fisico che ha dat na ottima risposta a sti quattro mesi de bombardamento atletico!
Anca CarloZeroAllenamentiColla le tra i pi attapirai, ma dopo aver partecipà a breefing chiarificatore e assistio a commozion dell’organizzator costretto al taglio, e dopo aver vardà in faccia a realtà, se metton el cor in pace e capion che a montagna no se fa comandar da gnessuni, no le ne bona ne cattiva, solo che sto anno a va cussì!
Resta el fatto che saltaron i 4 posti pi bei dea corsa, 3 cime de lavaredo, val travenanzes, Averau e Giau…….pazienza, motivo in pi par rifarla!
Ok, stasera no se parte, stasera se dorme…..forse! Fortunatamente son tra quei che aveva na sistemazion, e che sistemazion, grazie a RobyJohnDearColla avon trovà na location semigratis a pochi metri da a partenza co tant de bagno e possibilità de lavarse! Par strada recuperon anca super simpatia Cesconetto e ghe don ospitalità, da lu ghi ne sempre da imparar co se parla de ultra!
Sistemon veocemente e robe e gonfion i materassin al voeo e via al pasta party e giù birra!
No contenti e no sfamai, in quattro ndon dontarghe na pizza e nantra birra ovviamente, tanto, dovon far solche 85km…….no le che son drio ciaparla un po’ sotto gamba? No perche su 10, solche in 3 i ha fat pi de 70km……me sa che doman ghin vedaron dee bee!
A not le un travaglio, vutu l’adrenalina dea partenza mancata, vutu a tension dea nova corsa, vutu Johnny che duga col teefonin e no le bon de cavar a soneria, vutu Carlone che se remena sul let che sembra l’apie i sonagli, vutu Johnny che na volta stusà el teefonin taca russar tempo zero…..risultato: dormio pochet e ae 5.00 e persiane alzae ghe assa che a luce de na alba magnifica dughe de anticipo sua sveglia!
Frenesia, ultimi controlli sul zaino e sua sacca che mandaron a metà percorso e via, consegna sacca, taping sul denocio e coeazion al bar, bar praticamente intasà de gente in braghesette curte, col zaino in spaea, borracce, cannucce, calzini compressivi, retine che nasconde barrette gel e chissacchè, tutti a scambiarse i ultimi consigli, tutti a augurarse un condiviso divertimento!
Proprio intanto che riconsegnonvi al banco i caffè, macchiatoni, spremute, compreso de miele e innumerevoli bustine de zucchero, entra al bar e nostre miss che parteciparà alla Cortina Trail, raggianti e in gran forma e cerca de passar a calca par vegnar darce coraggio, ma sul pi bel che le rivae a qualche metro, noantri, da gran signori, ciapon l’uscita secondaria e senza tant cagarle ndon drio i nostri mestieri. Solo dopo, incalcà i partenza me rendarò conto del fattaccio, pardon!
Sbrigà e ultime necessità in qulache bagno improvvisà se trovon in partenza, ancora diese minuti e se parte! Anca qua riuscion a dividarse, visto che son a circa 400 persone da a linea de partenza, cercon de trovar spazio e senza tanti boni progressi se forma do gruppet!
Dai vignì vanti, no tornè indrio volatri, se resta staccai e se don un cinque a distanza, bona corsa tosatti!
Do minuti a partenza, Morricone a manetta come colonna sonora e pel de oca alt 2 schei, conto alla rovescia………….DieciNoveOttoSetteSeiCinqueQuattro………
……….Zio billy,
3 secondi e se avvera el sogno…………..
3 secondi e se parte………
3 secondi dove te riesci vedar che doterzi dei partenti le drio filmar col teefonin….
3 secondi e scumissia l’avventura……..
3 secondi e via a capir che ritmo tegnar…….
3 secondi e chissà cossa succedarà…….
3 secondi e vedon cossa succede………
3 secondi e speron de portarla casa……
Si insomma, i sarà 30 e passa kiometri in manco, ma sempre 87 in montagna, e, cosa non poco importante, i me ha cavà i unici tratti che conosseve de sta corsa!
Va ben dai, fon passar sti 3 secondi ae svelte, che no me toche ritirarme ancora prima de partir!
TreDueUno………..e via CAZZO!
Via…….i primi via, noantri no, massa gente davanti, temp che tutti parte faronsi ora bevarse nantro caffè, ma tanta le l’usma de partir che se fa quasi corsa da fermo, skip, balzi, spinton….VUI PARTIR!!!!!!!
Ghe vorrà circa un minuto prima de passar sotto a partenza, te l’aveve dita che le sempre meio partir davanti, te si pi libero, pi tranquio, no importa se te devi far el tempo o no, le sempre meio partir pi vanti possibie. Certo che quei che parte camminando, co l’idea de combattar coi cancelli orari……i dovarie partir pin drio!
Partir co sto clima de festa però,co na montagna de gente assiepada sue transenne che te batte e man, che te incita, le na emozion davvero indescrivibie, te te senti Kilian, si Kilian Jornet, quel che va forte, quel che se mette tutti in scarsea, quel che fa notizia co no el riva primo………ma te devi essar consapevole e rallentar, cazzo te si TizioCaioSempronio, no Kilian!
Dopo el primo chiometro mistico, fon n’attimo a conta: mi, Lorenz e Nicola, chealtri i e pin drio, me volte ma già no i vede, mah…..intanto ndon avanti!
Poc dopo, in leggerissima saita sempre asfaltata, ancora in Cortina, Nicola se stacca lamentando un ritmo troppo elevato. Poc dopo invece, vede passar Stefano co un passo degno dei primi in classifica e ripense al discorso de partir davanti…….vai Stefano cazzo, te devi star la davanti ti!
Inizion a saita asfaltada del passo Falzarego (crede) e dopo un per de rampe, taion dentro par na mulattiera sull’erba che dopo diventerà strada bianca, sempre in saita, alternando rampe e tratti meno ripidi, noantri de contro alternon na bona camminada co na corsetta leggera, Lorenzo, de so, alterna un “ ndon pi pian che le meio” a “son drio ndar massa forte”. Mi ghe crede al so cardio e cerche de contegnarme!
Par el soito teorema del partir vanti, se trovon in continuo sorpasso e dopo aver passà i splendidi “Laghi Ghedina”, anca se la da essar solche uno, ghe spieghe par ben el teorema a Lorenzo, “se partionvi davanti, fonvi co comodo el nostro ritmo, qua inveze, sorpassa uno sorpassas cheraltro, rischion de sbagliar tut!
Va ben dai, a prima saita le ndata, Passo Posporcora, bea saitina che dopo l’ultimo tornantin verso sinistra spiana e ce permette de ammirar a Valle e montagne varie che no savarie darghe nomi, tutte bee cazzo, tutte coa neve sue punte, bel bel e bel, se fussimo partii de not, col cavolo che avaronsi viste! Ah, me sgranocce già na barretta, ho fan, a coeazion de stamattina le stata misera par el me targhet, o saveve, ma par fortuna co quel che ho in zaino posse sfamar na tribù! Come noto, me mort el Garmin, fedele compagno de viaggio, un mese fa circa, ma el bon Lorenzo lo sostituisse degnamente aggiornandome continuamente su “Quota-Km-Tempo” e mi drio man impizze a calcolatrice mentae e fae già conti…..”dovrie rivar circa…….” Che insemenio, manca ancora 80 chiometri e già pense a quando rivarò!
Temp quasi gnanca de abituarse a sto mangiaebevi dae incantevoli vedute, che taion do par un troi, e giù a tornanti, giù in sottobosco infido coe radis che invita e scarpe a ingambararte, giù giù giù che tache pensar a cossa cazzo serve far saita se drioman deve far discesa…….tranquio Gian me dise, le questo el bel, le questo quel che te cerchi, le questo che te porta fin qua!
A legge del contrappasso a me accompagnarà spess intorno a Cortina, giunti a valle se imbarcon su na ciclabile piana, par quant piana posse essar na strada nee dolomiti, a riesse un pochetin ad annoiarme, ma pena ndon fora dal bosc cambie idea e me diverte, Lorenzo me aggiorna come al soito sui dati gara e mi me compiace tra mi e mi de aver indovinà, 2 ore ndate!
E scumission a trovar i ristori, 17° km, rifugio Ospitale, anca se el sembra pi na stazion dei treni dismessa, comunque, passon sotto l’arco dea Redbull coi operatori che vol sganciarmine na lattina, ma passe oltre e vae diretto far el pieno de acqua ambo borracce. Na vocina me ciama, ma no capisse…..a si ecco……come…….ah…….no ghe crede, le a Nutella, distesa sopra una croccante fetta biscottata…..mmmmmm, rive…ma sul pi bel Lorenzo me sveia co un “dai che ndon, movate, cossa situ drio far”. O varde suito par stort e “Lorenz, sta mia romparme i cojones è, mi fae ristoro, va in mona, che no te scumissi” e vede che el se invia camminando!
Conclude el me incontro amoroso coa Nutella, beve do bei bicer de Coca e ciape al voeo un per de toc de banana e me invie!
Riciape Lorenzo che me spetava e me fae iutar a versar a bustina de maltodestrine sua borraccia….mai più zio billy, le pi quea che el me ha ravessà sue man e sue gambe! Va ben dai, mai paura, vanti!
Seconda saita, Forcella Sonforca, tutta mulattiera, tutta con a bona pendenza, tutta camminando, tutta co Lorenzo, tutta a testa bassa, anca se non forzando, tant che rischie de sbregarme a testa su na rama bassa e sporgente!
Verso a fine el panorama se verde, aveve sentio che iera un pecà passar de not par qua, perché iera bel da vedar, e ghin ho conferma coi me occi, verso a fine passon par na stazion de risalita e ghe fae segno a Lorenzo de un canalone ripido e pien de neve, coa seggiovia che se inerpica su su fin sua ponta, roba da vertical limit, roba impensabile par mi e lu!
Traverson un pontesel improvvisà e su danovo, vedon a forcella co un po’ de gente, e scumission pestar neve….passon un laghet dal caratteristico color “lago di montagna” e su su, co Lorenzo che detta el passo!
Prossimo al sforcellamento, vede uno coa macchinetta fotografica che ghe fa segno a quei 20 metri davanti noantri che el sentiero devia leggermente verso a nostra sinistra e questi se adegua, rivando però comodo comodo al mini bivio, varde ben in su, occiai a specchio, giubbetti senza maneghe, caveio pettenà ben……zio billy de un zio billy, le Johnny, e nol iera drio indicar a deviazion, el iera drio farghe segno de tirarse via che el dovea farce a foto a noantri!
Rivai inzima me complimente co un “ma cossa fetu qua sora”, lu me risponde “bravi, dai che se tra a 100esima e 110ma posizion”!
“Sticazzi” pense, “quanti ghin avonti passà via”! ghe domandon anca come i e messi i nostri davanti e subito ce riva el ragguaglio, TarzanBoy 23° e 25° Stefano Jardineros!
A discesa sul poccio post neve no me assa tant temp a pensar, ma mi e Lorenz avon a stessa opinion, se Stefano al secondo kiometro iera pin drio de noantri e des al 27simo le cussì vanti……..no vorie mai che……dai, pensa a star attento no ingambararte che a discesa le tecnica!
Scainet sul pacioro, slipego ripido, el primo tratto le abbastanza impegnativo, ma ben presto diventa ancora mulattiera, ma sempre discesa. No fae temp rilassarme che “track”, sente un indurimento pre-crampi sul polpaccio destro!
Scumizzie smadornar……zio billy manca ancora 60km……un po’ prestin tacar aver crampi! Su quel che me avvicine a Lorenz par dirgheo, vede che tira fora na bustina dal zaino…..e co ghe dise del me problema, me incorde che a bustina che le drio rovessar dentro, le come a mea, quea famosa che ha el compito de rispedir tempo zero i crampi al mittente!
Ok fonse sto cicchetto in compagnia, intanto ghe dae un ocio ai ingredienti……percentuale mondiae de magnesio e potassio, do sgorlae gusto flowers, dolz che mai pi e il gioco è fatto, tempo zero e no sente pi fastidi eliminati…..però, sarà mia doping!!!!
Giù in discesa ancora, da mulattiera a sottobosco, passando par el passo Tre Croci dove riconosse Massimo Peizzer, in compagnia de Ivan Poeoni e so morosa Valentina che, incortesi in ritardo de noantri i cerca in quattro e quattr’otto de verdar fora na bandiera gialla, ma no fae ora capir!
Mamma mia quanta genter qua, tutti a battar e man, tutti a darte coraio, Omeni, femene, tosette, tosattei, tutti col sorriso, che bel…..traverson a strada e sempre giù, sempre ripida!
Eccoce al 33°km, ristoro hotel Cristallo, copia-icolla quel del 17esimo, stessa storia Redbull stessa storia Lorenzo, stessa storia par via de cossa magne e beve, co l’aggiunta però de un quadratin de cioccolata! Qua riparte insieme a Cesconetto, qua me incita uno da Maser, si, so che le da Maser ma no so darghe un nome, solo a sera al pasta party Paolo ghe darà a giusta connotazione, Stefano Poeoni, so parent, credo!
Suito saita dura e suito Cesconetto sparisse, ma in compenso riappare Lorenzo, sta volta faer mi el ritmo, porca miseria che dura sto giro, zio billy le dal passo Porcospora che el stimoeo de far un Pipì Stop va e vien ogni 5-6 chiometri….che storie!
Lorenzo borbotta contro el Garmin perché el iera convinto de no dover rivar sora i 2000 metri, visto che el lago misurina dovarie essar 1700 circa, mi fa eun passo che no me sembra esagerato e ndon via regoeari ma consapevoli de essar in gran vantaggio sua tabella oraria…..ok ma varda che i sarà 85, no pi 118!
A spiana, su e giù sul bosc, co tante radis e crode da saltar……salt che no va d’accordo coi crampi, me tocca verdar nantra bustina…speron ben!
Finalmente el Lago Misurina se presenta sua nostra sinistra, finalmente riesse far el Pit Stop e riparte, e riciape Lorenzo a fine lago!
Ecco ancora Ivan, stavolta riesse vedar ben a bandiera, gialla, col logo ScarpeBianche e in alto a sinistra a scritta “VAI CAZZO”, grande Ivan. Ecco anca Gidio Coea e Broese, Gidio come sempre mugugnante difronte gente che corre, Broese inveze che par che l’apie e spine sul cul…… Che bel che le vedar facce nostrane! Anca Massimo e Johnny i e qua, i me accompagna al ristoro, 42simo chilometro, metà gara circa!
Soita telenovela ristoro, ma sto giro asse ndar via Lorenzo, qua ritire a sacca che aveve mandà e me cambie a parte alta! Attimi de terrore quando no trove chealtre do bustine anticrampi, senza sarie dura finirla me dise, ma a fine me incorde che e ghi ne, sollievo. Son tranquio, tant che su richiesta de Johnny, donte Giovanni Bianchin sul gruppo wathsapp, magne pan e saeado al voeo. Ma fae na capèa, viste e borracce mede vode, no rabbocche pa no alterar a concentrazion de Sali…….errore che pagarò caro!
Parte saeudando Massimo e super Johnny, carico de viveri in man, fae do conti al voeo e capisse che no me sarà pi possibie vedar Lorenzo, son stat massa fermo. Problemi zero, me divertarò in soitudine!
Qua ciapon a prima deviazion del percorso, gnente TreCime oggi, si va verso sinistra, valle RinBon me sembra! Ok dai le beina, bel tratto in leggera discesa, co tant de vacca al pascoeo in medo a strada che me varda in “mucchesco” come a dirme de no passar par de à, mi obbedisse e a scarte co na 50ina de metri offroad…… e dopo na saita co successiva discesa su sentiero tecnico se imbarcon su pianura pianura pianura, e zero acqua acqua acqua acqua, solo un guado che me serve par usar a terza bustina anticrampi, e quea del lago di Landro no posse certo bevarla! Col lago di Landro finisse a strada de greto de fiume e inizia ciclabile bianca che me portarà Cimabanche, ciclabie dove me raggiunge Roby, el me accompagna medo kiometro e dopo o asse ndar, mi deve cammianr par vedar de tornar in qua, son svarionà, ma iera tut in preventivo, a crisi ghe sta, vedon de farla durar poc! Mamma che brutti 15 kiometri che son drio passar!
Finalmente a Cimabanche, ristoro del 57simo! Qua cede a tentazion dea Redbull, ma le cussì dolza che a me vegnarà su par 2 ore cazzo!
Ecco ancora Johnny, triste in faccia, triste par a me situazion, el me domanda come va i crampi, mi son sereno, a va maet, ma insomma, manca solche 30km……a porte casa si!
Coa scusa dei trenta kometri varde l’ora e fae do conti, le e 15.30……ok dai visto come son ciapà ho paura che me vorrà 5 ore tonde……20.30 eora, 12ore e mezza, sperave sotto e 12 ma ghe sta dai!
Riparte camminando e tacche pensar che des pol essar che me ciappe anca Carlone e Nicola, ma se va suito in saita e no ho pi tant temp de pensar, dopo na diesina de minuti però, sente vibrar el teefonin, “sarà johhny che scrive sul gruppo wathsapp che Carlo le a Cimabanche” pense, stessa roba su Nicola altri 5 minuti dopo……e intanto su e su verso Forcella Lerosa, 500mt de dislivello circa par na saita abbastanza impegnativa, con a rampa finale davvero massacrante! Qua fae altri do conti sull’inseguitore Carlone, “col ritmo che tegne el pol solche guadagnar in pianura, e a pinura dovarie essar finia”……”tasi e pensa a no farte vegnar i crampi”! E me ripete in ment “ecco Vettor Gianluca, 12ore e 26 minuti”, me son infigà su che el sarà questo el me tempo de corsa……
Des a spiana ma no riesce corrar, me vien i crampi, gnanca a borraccia fa pi effetto, va ben dai adeguonse, cammine a pianura e a saita, corre a discesa, strano ma vero, in discesa riesse corrar, tant che ciape un Inglese e gher fae el ritmo, ma pena che a spiana me trasforme in pinguino e me blocche, via al passo danovo, co l’inglese che me passa e me ringrazia par el ritmo che ghe ho tegnuo! 200 metri e le ancora discesa, via ancora e o ripasse, giù fin al ristoro Malga Ra Stua, 67 kiometri fatti!
Beve tutte do e borracce, do bei biceron de Coca, un bel panin col saeado e via al passo magnando quel che me resta in man!
Scumissie star ben, a discesa le tecnica, e vae via veoce, a pianura no me porta crampi……..par qualche kiometro, ma dopo si, se riscumissia camminar, fortuna che se alterna saitine a discesette, cussì i inseguitori no dovarie guadagnarme pi de tant! “12 ore e 26 minuti”……soito pensiero.
Ormai riesse riconossar gente che me saeuda, na signora coa maietta Asics, na fameietta, un per de tosattei, anca questi probabilmente i e drio seguir qualcuni!
Eccome dess sotto a Val Travenanzes, ma oggi no, el taglio me l’ha cavada, co tut el resto che vegniva dopo, el tratto pi bel, 30 kiometri mozzafiato, ma anca i pi duri de quea che doveva essar a LUT 2013! Zio billy pense, ciapà come che son a sarie stata na guerra farli, ma sicuramente sarie partio molto pi pian, visto che ho 2 ore bone de vantaggio sua tabea de marcia LUT!
Risaliamo (mi e mi) il passo Posporcora da questo versante, co dee rampe su mulattiera che cava e gambe, porca troia che dura, “12 ore 26 minuti”….ancora sto pensiero che me tarma, ma in qualche modo rive in zima! Qua a spiana ancora e ndaron a rifar al contrario el tratto de stamattina fin ai Laghi Ghedina, ma prima dea discesa ghi ne el mangiebevi interminabile, interminabile perché son costretto camminarlo! Riconosse alcuni passaggi, ma no so dirme quant posse mancar a a discesa!
Me teefona Johnny a informarse dove che son…..
“ me mancarà diese kiometri”
“ Ah ok, e Carlone te aeo ciapà?”
“ No zio billy, eo vizin?”
“ Eh, diese minuti a cima banche”
“ beh dai, o el me ciapa prima dea discesa o nol me ciapa altro”
Ma a discesa se fa desiderar, no a riva altro, e intanto me supera 4-5 che riesse corricchiar. Ghin approfitte par godarme el panorama, stesso de stamattina, ma sempre piacevole!
Finalmente rive al tornantin maledetto…..des dovarie essar tutta discesa, bea su mulattiera, regoeare non troppo ripida…….eora giù cazzo, bon ritmo, a recuperar quei che me aveva passà poc prima!
No credeve che, dopo 80km e pi de 3000 mt de dislivell, sarie riuscio a corrar in discesa cussì forte, ben dai, content par e bone sensazion rive all’ultimo ristoro, Laghi Ghedina, soiti 2 bicer de Coca e pronto a ripartir. Qua sente i do bocce del ristoro che dis che manca meno di 5km, tutti in discesa. Ma me torna in ment el breefing pregara, “dopo l’ultimo ristoro avrete ancora 7km”…..speron ben!
Dopo un tratto in pianura se piomba do in discesa, ripida ripida, ma a corre davvero ben, passon na casetta col laghetto davvero bea e dopo traverson el torrente Boite, proprio dove l’anno scorso avonvi fat el bagno, “impensabile farlo sto anno” pense, “ghe sarà tre volte tanta acqua”……
Des son sull’asfalto, saitina e discesa, in lontananza vede a sagoma inconfondibile del Bettiope, macchina fotografica in man. Foto de rito al voeo e dopo via, Bettio me accompagna e me conforta sul fatto che manca medo chiometro…..zio billy le saita ma riesse corrar, che storie, cossa vol dir saver che ormai le question de metri!
entron sul viale de arrivo, el Bettio da gran signore me assa godarme in solitudine i applausi dei ultimi dusento metri!
“ dai che le fatta” “bravo” “dai bravo” clap clap clap……..no ghi ne paroe par descriva l’emozion dei ultimi metri, tant che aumente anca el ritmo, mani in alto e taie el traguardo, col duo de speacker che me parla, forse me domanda qualcosa, ma noi caghe, son su nantro mondo, son sul FinischerWorld!
Vede Johnny che me ha fat a foto e vae darghe un cinque, ma vorrie darghine cinquecento, tant bel e importante le stat vedarlo pi volte in ste 11 ore e 18 minuti! Me par de intravedar un cin de commozion, ma Cesare, a Lara e a Diana me distoglie e vien saeudarme……rinvie a commozion de 5 minuti quando, sentà sul bordo de na fioriera ciame casa, impossibile trattegnar e lagreme, cazzo che bel che sarie stat aver qua e me donne, qua all’arrivo a spetarme, magari taiar el traguardo par man dee tosette……..
No ghi ne paroe, chi che no prova no podarà mai capir, na ultramaratona te regaea emozioni impensabili, in 11 ore ghin ho passà de tutti i coeori, un alternarse de sesazioni emozioni pensieri, contrastanti antitetiche opposte……che strano, ma le proprio questo che me affascina de ste corse, le questo che vui, le questo che me spinge a farle!
El dopo corsa…….. ciò, no posse contarve proprio tut, el prossimo anno vegnì anca voaltri cussì o vivon insieme……
ma si sa qualcosa dei gilet da finisher? 
